بێرنار فریۆ
لە فەڕەنسییەوە: سەلاحەدین بایەزیدی
لەگەڵ خوشکە بچووکەکەمدا چوومە باغچەی ئاژەڵان. ژنێکم بینی کە خواردنی دەدا بە مراوییەکان. ئەو لەتە نانی بۆ فڕێ دەدان و مراوییەکانیش بە پەلە بۆ لای ژنەکە مەلەیان دەکرد بۆ ئەوەی پڕ بدەنە لەتە نانەکان.
پاشان، بە بەردەم قەفەزی مەیموونەکاندا تێپەڕین. کوڕیژگەیەک بە نێو میلەکاندا مۆزێکی فڕێ دا. دوو بەچکە مەیموون لەسەر دارەکانیان ڕا بازیان دا بۆ ئەوەی بیگرنەوە.
ئەمە بیرۆکەیەکی پێ دام. دەستی خوشکە بچووکەکەمم گرت و لەگەڵ خۆمدا بردم بۆ بینینی تیمساحەکان. شتێکی ئەوتۆ بەدی نەدەکرا. تیمساحەکان لە نێو ئەستێرەکانی خۆیاندا بوون و نووستبوون، تەنها چاویان لە ئاوەکە هاتبووە دەرێ. من لەپڕێکا خوشکە بچووکەکەم بەرز کردەوە و بەسەر پەرژینەکەدا فڕێم دا و شڵپ! کەوتە نێوەڕاستی ئەستێرەکەوە. ئەوجا تیمساحەکان خەبەریان بۆوە و بۆ داقورتاندنی لێیان بوو بە شەڕ…
نا، وا نەبوو، گاڵتە دەکەم، شتەکە وا ڕووی نەدا.
ئەوەی ڕاستی بێ، لە تەک خوشکە بچووکەکەمدا ڕۆیشتمە باغچەی ئاژەڵان. ژنێکم بینی کە...، هتد. پاشان، بە بەردەم قەفەزی مەیموونەکاندا تێپەڕین... ، هتد.
ئەمە بیرۆکەیەکی پێ دام. دەستی خوشکە بچووکەکەمم گرت و لەگەڵ خۆمدا بردم بۆ بینینی تیمساحەکان.
ئەو لێی پرسیم:
"ئەرێ تیمساحەکان دلۆڤانن؟"
لە سۆنگەی منەوە ڕواڵەتێکی دلۆڤانیان هەبوو. تیمساحەکان لە نێو ئەستێرەکانی خۆیاندا بوون و نووستبوون، تەنها چاویان لە ئاوەکە هاتبووە دەرێ. بۆیە، وەڵامم دایەوە:
"ئۆ، بەڵێ، زۆر دلۆڤانن."
"دەمەوێ بیانلاوێنمەوە!" خوشکەکەم وای گوت.
ئەمن خوشکە بچووکەکەمم زۆر خۆش دەوێ، بۆیە یارمەتیم دا پەرژینەکە ببەزێنێ. ئەو لە حەوزەکە نزیک بۆوە، دەستی درێژ کرد، تیمساحێک قەپۆزی لێک هەڵپچڕی و پڕی دایە دەستی خوشکە بچووکەکەم و کررررت، کررررت! بە ساغی قووتی دا.
نا، وا نەبوو، گاڵتە دەکەم، شتەکە وا ڕووی نەدا.
ئەوەی ڕاستی بێ، من خوشکی بچووکم نییە. من تەنها برایەکی بچووکم هەیە. ناوی بێنوایە. ئەم پاشنیوەڕۆیە دەبێ پیاسەی پێ بکەم. دایکم داوای لێ کردم.
دەیبەمە باغچەی ئاژەڵان.
"بێنوا، دێیت؟"
هیچ نظری موجود نیست:
ارسال یک نظر