سەروتاری گۆڤاری terra cognit، ژمارە ٢٧، پاییزی ٢٠١٥.
سیمۆن پرۆدۆلییێ*
ئالبان ئیمەری، بریل ئەمبۆلۆ، ئێلینا دوونی، ئێلیزابێت ئۆکیسای، لادا ئوومستاتێر، محەممەد یڵدرملی و سەلاحەدین بایەزیدی چ خاڵێکی هاوبەشیان هەیە؟ لە یەکەم ڕوانیندا، شتێکی ئەوتۆ بەدی ناکرێ. ئەم کەسانە بە کاری جۆراوجۆرەوە سەرقاڵن، تەمەنیان جیاوازە و هەر کام لە ناوچەیەکی سوییس دەژین. بەڵام ئەوەندە بەسە سەیری ناوەکانیان بکەن تاکوو تێ بگەن ئەوان "خەڵکی ئێرە" نین. ئەوان یاخود بنەماڵەکانیان کۆچبەری سوییس بوون. لەم ڕووەوە ئاساییە سەربوردەی ئەوان پەیوەندیی بە کۆچەوە هەبێ. بەڵام ئەمە ڕواڵەتی مەسەلەکەیە. چونکە شتێک کە ئەمان جیا دەکاتەوە، ڕەگەزەکەیان نییە، بەڵکوو ئەو شتەیە کە دەزانن ئەنجامی بدەن و ئەنجامی دەدەن. ئەم سیمایانە دەرفەتی ئەوەیان پێ داین سەردانی کەسانی پسپۆڕ لە بواری مۆسیقا، ئەدەبیات، فەرهەنگ، هونەر، ئابووری، وەرزش و سیاسەت بکەین کە کۆمەڵێک بەڵگەن و دەیسەلمێنن پۆلێنبەندیی کەسەکان بە پێی نەتەوەیان (ڕەچەڵەک) هیچ واتایەکی نییە.
نابێ لە سوییس سەرت سووڕ بـمێنێ کە دەگوترێ بەڕێوەبەرێکی بەڕەچەڵەک کۆت دیڤوار کە ساڵی ٢٠١٥ هاتووە، ئێستا سەرۆکی بانکێکی گەورەی سوییسە. بە دڵنیاییەوە، ڕەنگە هەندێک بیر بکەنەوە: "چی، پیاوێکی ڕەش پێست؟ ئاخۆ بەڕاستی ئەم توانایەی هەیە؟"
کۆچبەران بەردەوام تووشیان بە تووشی هەڵسوکەوتی هاوشێوە دەبێ، تەنانەت ئەگەر ڕاشکاوانە توانا و بەهرەیان لەو کارە زیاتر بێ کە پێیەوە سەرقاڵن. کارۆل بێرتوود باسی ئەو فاکتەرانەی کردووە کە بە داکشان و لەدەستچوونی ئەم بەهرانە کۆتایی دێ و پێی وایە دەبێ درێژە بە ڕێگە بدرێ تا پێش بە دۆخی ئاوا بگیرێ.
ئالبان ئیمەری، بریل ئەمبۆلۆ، ئێلینا دوونی، ئێلیزابێت ئۆکیسای، لادا ئوومستاتێر، محەممەد یڵدرملی و سەلاحەدین بایەزیدی سەرکەوتوو بوون لەوەی دان بە سەرکەوتنەکەیان دابنرێ، هەرچەند لەم پێناوەدا کەند و کۆسپێکی پتریان هاتبێتە ڕێ. بەسەرهاتیان پێمان دەڵێ کە ڕێکەوت ڕێگە بۆ سەرکەوتن خۆش دەکا. لەگەڵ ئەوەشدا ناکرێ هەموو شتێک بە چارەنووسێکی کتوپڕەوە گرێ بدرێ و بە گشتی بە قازانجی کۆمەڵگەیە ئاستەنگییەکان هەموار بکرێن. ئەو کەسانەی پەنابەرن و لە دونیایەکی جیاوازدا گەورە بوون، بە بینینی ڕۆڵی ناوبژیوانی لە نێوان دۆخە جیاوازەکان و پێکهێنانی کۆمەڵێک تۆڕ لە نێو خۆدا، دەتوانن دەوڵەمەندییەک بن بۆ سوییس، هەڵبەت نەک تەنیا لە ڕوانگەی ئابوورییەوە. دواجار، تێڕوانین لە سوییسێک کە پێویستی بەوە نەبێ کۆمەڵگە بەسەر خەڵکی خۆجێیی لە لایەک و هی بیانی لە لایەکی ترەوە پۆلێنبەندی بکا، دەتوانێ گۆڕانێکی بنچینەیی لە پەرسپەکتیڤدا بەدی بێنێ. دەقێکی ئەدەبی کە لەم گۆڤارەدا هاتووە نیشانمان دەدا بیرۆکەی هەڵاواردن چەندە پووچە.
*سیمۆن پرۆدۆلییێ ڕەگەزناس و بەڕێوەبەری سکرتاریای کۆمیسیۆنی فیدڕاڵی سوییس بۆ کاروباری کۆچبەرانە.
هیچ نظری موجود نیست:
ارسال یک نظر