پۆلیسی ئیتالیا ڕایگەیاند کە هەڵیکوتاوە سەر تۆڕێکی جیهادی ئەوروپیی کە پێشبینی دەکرا لەپێناو ڕزگاری مەلا کرێکاری بەندکراو لە نەرویج، چالاکی ئەنجام بدەن. لە چوارچێوەی ئەم هەڵمەتەدا، داوا لە سوییسیش کراوە یەک دوو کەس قۆڵبەست بکا.
دادگای ئیتالیا حوکمی قۆڵبەستکردنی هەڤدە کەسی داوە کە ١٦ لەوان کوردن و یەکیان خەڵکی کۆزۆڤۆیە. شەش ئەندامی ئەم تۆڕە لە ئیتالیا گیراون، چواریان لە بریتانیا، سێیان لە نەرویج، هاوکات ژمارەیەکیان بۆ شەڕکردن لە پاڵ دەوڵەتی ئیسلامیدا ڕوویان کردۆتە عێراق و سووریا.
فەرمانی قۆڵبەستکردنی دوو کەس بە سوییس دراوە کە بە گوێرەی میدیاکانی سوییس یەکێک لەو دوو کەسە داواکراوە لە شەڕی سووریا مردووە.
وەک دەگوترێ، ئەندامانی ئەم تۆڕە پەیڕەوانی نەجمەدین ئەحمەد فەرەج ناسراو بە مەلا کرێکارن کە کوردێکی بناژۆخوازی تەمەن ٥٩ ساڵە و لە ساڵی ١٩٩١ەوە لە نەرویجە.
بە وتەی گیوڤانی گۆڤێرنال بەرپرسێکی دەستەی ئۆپەراسیۆنی تایبەت، گرنگیی ئەم ئۆپەراسیۆنە لەوە دایە کە بە شێوەیەکی هاوئاهەنگ لە ئیتالیا، بریتانیا، نەرویج، فینلاند، سوییس و ئاڵمانیا بەڕێوە دەبرێ.
ناوبراو دەڵێ ئەم تۆڕە لە ڕێگەی ئەنتەرنێت و بە شێوەی نهێنی پەرەی سەندووە.
بە پێی لێدوانەکانی ئەم بەرپرسە، گرووپەکە "خۆی بۆ ناردنی ژمارەیەک جیهادی بۆ دەرەوە ئامادە کردووە و ویستوویانە کۆمەڵێک چالاکی و لەوانە هێرشی خۆکوژی ئەنجام بدەن تاکوو بەمجۆرە هەوڵی ڕزگارکردنی سەرۆکەکەیان دابێ."
مەلا کرێکار لە نەرویج بە هەڕەشەیەک بۆ سەر ئاسایشی نیشتیمانی لەقەڵەم دەدرێ. لە ساڵی ٢٠٠٣ەوە هەوڵی ناردنەوەی بۆ عێراق دەدرێ بەڵام نەرویج بە هۆی نەبوونی گەرەنتییەک و ئەگەری لەسێدارەدانی لە لایەن عێراقەوە تا ئێستا ناوبراوی نەناردۆتەوە.
مەلا کرێکار دامەزرێنەری ڕێکخراوی ئەنسار و ئیسلامە لە کوردستان. لەگەڵ گرووپەکەی لە لیستی تیرۆری ئەمریکا و نەتەوە یەکگرتووەکان دایە.
هیچ نظری موجود نیست:
ارسال یک نظر